Ерөнхий сайд асан С.Баяр гуайн тэргүүлдэг "Чингүнжав сан"-ийн санаачлагаар, "Гамма" агентлаг "Монгол, Монголчууд миний дуранд" буюу МММД 2016 гэрэл зургийн уралдааныг зохион байгууллаа. Уралдааны бүтээлийг http://www.mmmd.mn онлайн вэб сайтаар хүлээн авсан бөгөөд эх орны өнцөг булан бүр дэх 420 гаран оролцогч 1,800 орчим гэрэл зураг илгээсэн юм. Тухайлбал, Ховд, Говь-Алтай, Дорнод, Баян-Өлгий аймгийн гэрэл зурагчид, гэрэл зураг сонирхогчид оролцлоо.

Энэхүү уралдааны шагнал нь монголын гэрэл зургийн түүхэнд байгаагүй өндөр байсан нь уралдааны нэг онцлог. Нийт 30 сая төгрөгийн шагналын сантай байсан бөгөөд энэ нь гэрэл зурагчдын хүч хөдөлмөрийг тэр хэрээр үнэлсэн явдал байлаа.
1,800 бүтээлээс шилдэг гэсэн 100 зургийг шалгаруулж үзэсгэлэн дэлгээд байна. Нэг гэрэл зурагнаас дээд тал нь 4 бүтээл шалгарчээ. Тэдгээрээс шагналт байранд:
"Монголчууд" номинацид - Баян-Өлгий аймгийн гэрэл зурагчин Нуржас тэргүүн байр,
"Хөрөг" төрөлд - "Тусгал" клубын гэрэл зурагчин Батгэрэл тэргүүн байр,
"Аж байдал, ахуй" төрөлд - "Ардчилал" сонины гэрэл зургийн сурвалжлагч Ү.Одбаяр нар шалгарч тус бүр 3 сая төгрөгөөр шагнуулав. Харин удаах хоёр , гуравдугаар байр болон шагналт байр эзэлсэн 24 гэрэл зурагчдыг 500 мянгаас 2 сая төгрөгөөр шагнаж урамшууллаа. Гэрэл зургийн сурвалжлагч Б.Бямба-Очирын хувьд тусгай болон дэд байрын шагнал хүртэж, 2 сая төгрөгийн эзэн боллоо. Монгол орон, Монголчуудаа сурталчилах энэхүү уралдаан 2 жил тутамд уламжлал болон зохион байгуулагдаө байх юм.
Дашрамд дурдахад, шилдэг 100 бүтээлийн үзэсгэлэн "Гамма" галерейд нээгдсэн байгаа.