Эрүүл мэнд, спортын сайдаар С.Ламбааг томиллоо

2016 оны тавдугаар сарын 20. Чуулганы нэгдсэн хуралдаанаар Засгийн газрын гишүүнийг томилох тухай асуудлыг үргэлжлүүлэн хэлэлцэв.



Чуулганы үдээс өмнөх нэгдсэн хуралдаанаар Засгийн газрын гишүүнийг томилох тухай асуудлыг хэлэлцэх үед Улсын Их Хурал дахь Ардчилсан намын бүлгээс уг асуудлаар авсан завсарлагын хугацаа дуусгавар болсон тул асуудлыг үргэлжлүүлэн хэлэлцүүлэх боломжтойг тус бүлгийн дарга Б.Гарамгайбаатар мэдэгдсэн юм.



Ингээд хэлэлцэх асуудалтай холбогдсон асуулт, санал үргэлжилж, Улсын Их Хурлын гишүүн Ё.Отгонбаяр, Н.Энхболд, Ц.Оюунбаатар, Ж.Батзандан нар нэр дэвшигчээс асуулт асууж тодруулан саналаа хэллээ. Гишүүд асуулт асууж санал хэлж дууссаны дараа Г.Шийлэгдамбыг Засгийн газрын гишүүн, Эрүүл мэнд, спортын сайдын үүрэгт ажлаас чөлөөлөх санал хураалт явуулахад гишүүдийн 96.4 хувь нь дэмжив. Үүний дараа С.Ламбааг Засгийн газрын гишүүн, Эрүүл мэнд, спортын сайдаар томилох санал хураалт явуулсныг гишүүд 94.7 хувийн саналаар дэмжлээ. ГЭРЭЛ ЗУРГИЙГ Б.БЯМБА-ОЧИР

ЛамбааС.Ламбаа