2016 оны тавдугаар сарын 07. Монгол, ОХУ-ын найрсаг харилцаа, хамтын ажиллагаанд чухал байр суурь эзлэх салбар бол батлан хамгаалах байдаг. УИХ, Засгийн газрын гишүүн, Батлан хамгаалахын сайд Ц.Цолмон өнгөрсөн сарын сүүлээр ОХУ-д болсон олон улсын бага хуралд илтгэл тавьж, ОХУ-ын Батлан хамгаалахын сайд, армийн генерал С.К.Шойгутай уулзжээ. Энэ тухай түүнээс зарим асуултад хариулт авлаа.
-Та ОХУ-д Москвагийн V бага хуралд оролцож, илтгэл тавьсан гэсэн. Энэ талаар тодруулахгүй юу?
-ОХУ-ын Батлан хамгаалахын сайдын урилгаар өнгөрсөн сарын 27-28-ны өдрүүдэд Москва хотноо аюулгүй байдлын асуудлаар чуулсан олон улсын бага хуралд оролцлоо. Олон улсын аюулгүй байдал, түүнд нөлөөлж байгаа гол хүчин зүйлүүд, тэдгээрээс урьдчилан сэргийлэх, аюулгүй болгох чиглэлийн хамтын ажиллагааны талаар хэлэлцсэн энэ хуралд дэлхийн 80 гаруй орон, олон улсын 10 байгууллагын нийт 600 гаруй төлөөлөгчид, үүний дотор 20 улсын Батлан хамгаалахын сайд, үүнээс гурав нь Ерөнхий сайдын орлогч, 17 улсын Зэвсэгт хүчний Жанжин штабын дарга, Батлан хамгаалахын дэд сайд зэрэг өндөр хэмжээний төлөөлөгчид оролцсон. Миний хувьд энэ бага хуралд бүс нутгийн аюулгүй байдал, өөрийн улсын цэргийн харилцааны талаар илтгэл тавьсан байгаа
- ОХУ-ын Батлан хамгаалахын сайд, армийн генерал С.К.Шойгутай хоёр талын уулзалт хийсэн. Хоёр улсын батлан хамгаалах салбарын хамтын ажиллагааны ямар чиглэлээр яриа өрнөв?
-Уулзалтаар өнгөрсөн оны 4 дүгээр сард уулзсанаас хойших нэг жилийн хугацаанд хоёр улсын цэргийн харилцаанд болсон үйл явдлуудыг дүгнэлээ. Тухайлбал, манай цэргийн салбар Улаан талбайд болсон ялалтын баярын цэргийн ёслолын жагсаалд анх удаа оролцсон, Цэрэг-техникийн хамтын ажиллагааны хамтарсан ажлын бүлгийн ээлжит хуралдаан хийсэн, Зэвсэгт хүчнүүдийн салбарын хамтарсан хээрийн сургууль амжилттай болсон, техникийн тусламж үргэлжилж байгаа, манай Зэвсэгт хүчний баг олон улсын цэргийн наадамд оролцсон зэргийг тэмдэглэсэн. Хоёр улсын салбарын хамтын ажиллагааны нэг үндэс болсон Монгол Улсад цэрэг-техникийн тусламж үзүүлэх тухай хоёр улсын Засгийн газар хоорондын хэлэлцээрийн хүчинтэй хугацааг сунгах тухай бидний тавьсан саналыг Оросын тал дэмжиж, энэ чиглэлээр ажиллахаа мэдэгдсэн. Мөн Монголын цэргийн албан хаагчдыг ОХУ-ын цэргийн сургуулиудад сургах сургалтыг үргэлжлүүлэх, үүний дотор цэргийн нэмэлт бэлтгэл бүхий ерөнхий боловсролын сургуульд манай өсвөр насныхныг сургахаар тохирсон. Уулзалтын үед зөвхөн цэргийн харилцааны төдийгүй зам тээвэр, ашигт малтмалын зэрэг харилцааны өргөн хүрээтэй асуудлыг ч санал болгож судалж үзэх талаар ярилцлаа.
- Засгийн газар хоорондын хэлэлцээрийн хүчинтэй хугацааг сунгаснаар манай талд ямар боломж нэмэгдэх вэ?
-Монгол Улс, ОХУ Цэрэг-техникийн хамтын ажиллагааны 2019 он хүртэлх дунд хугацааны хөтөлбөртэй. Засгийн газар хоорондын хэлэлцээрийн хүчинтэй хугацаа сунгагдсанаар энэ хөтөлбөрийг хэрэгжүүлэх, түүний хүрээнд зарим төрлийн зэвсэглэл, техник хэрэгсэл авах, тусламжийн хүрээний сургалтаа үргэлжлүүлэх боломж бүрдэнэ.
ГЭРЭЛ ЗУРГИЙГ Б.БЯМБА-ОЧИР/MPA

ОХУОросОрос улсЦ.ЦолмонЦолмон