Монгол Улс, Улаанбаатар хот. 2014 оны 1 дүгээр сарын 24. Яам, агентлагийн удирдлагуудтай сар бүр хийдэг “Хариуцлага, хяналт, хэрэгжилт” цахим хурал болж, ойрын үед хийхээр төлөвлөж байгаа ажлуудаа Ерөнхий сайд танилцууллаа.

“Улсын сайн малчин”, “Улсын тэргүүний фермер”, “Улсын тэргүүний тариаланч”, “Улсын тэргүүний тариаланч хамт олон”-д шагнал гардуулах ёслол болон цагаан сард зориулсан “Монголд үйлдвэрлэв-Цагаан сар 2014”
үзэсгэлэн худалдааг Үйлдвэр, хөдөө аж ахуйн яам сайн зохион байгуулсныг цахим хурлын эхэнд Ерөнхий сайд хэллээ. Энэ жилийн хувьд цагаан сард зориулсан үзэсгэлэн худалдааны борлуулалт урьд жилүүдийнхээс илүү байна.
Зөвхөн нэг аймаг тэрбум төгрөгийн борлуулалт хийгээд буцаж байгаа тухай мэдээ ирж байна гэлээ.

“Монголдоо бүтээцгээе” жилийг зарлаж байгаатай холбогдуулан Хөдөлмөрийн яамнаас гаргасан 40-өөс дээш насныхныг ажилтай болгох болон оюутны зуны ажил, оюутны цагийн ажил зэрэг хөтөлбөрүүдийг шинэлэг болсон гэж дүгнэлээ.

Бүтээн байгуулалтын ажлуудын бэлтгэлийг сайтар хангаж төлөвлөсөн зам, барилга болон цахилгаан станцуудын ажлуудыг хугацаанд нь эхлүүлж, чанартай гүйцэтгэхийг холбогдох яамны удирдлагуудад үүрэг болголоо гэж Засгийн газрын Хэвлэл мэдээлэл, олон нийттэй харилцах албанаас мэдээллээ.